الشيب المبكر

أعمل ايه لو شعري بدأ يشيب “بدري”؟

أول حاجة لازم أعرف يعني ايه بدري, امتى اعتبر ان دا مش شيب طبيعيتحول الشعر للشيب يختلف باختلاف الأعراق

أصحاب البشرة الشقراء يتحول شعرهم للشيب في منتصف الثلاثينات في المتوسط

يرتفع هذا المتوسط لأواخر الثلاثينيات عند أصحاب البشرة الخمريةويرتفع لمنتصف الأربعينيات عند أصحاب البشرة الأفريقية الداكنة

يقال ان القاعدة ان ٥٠٪؜ من الناس هايكون عندهم ٥٠٪؜ شعر أبيض عند سن ٥٠ سنة

طيب في أي سن يعتبر دا “بدري”؟ امتى اقول ان دا شيب مبكر؟

لو حصل قبل سن ٢٠ عند أصحاب البشرة الشقراءأو أقل من ٢٥ عند أصحاب بشرة خمريةأو أقل من ٣٠ عند أصحاب بشرة أفريقية داكنة

إيه الأسباب؟

فيه سبب وضحناه في التعريف وهو العِرْق

تاني أهم سبب هو الوراثة, الشيب في سن مبكر دايما بيحصل في عائلات بشكل وراثي

السبب التالي في الأهمية هو الoxidative stress.. يسمى الاجهاد التأكسدي ومعناه علميا وجود خلايا أكسيجين نشطة.. بيحصل مع التعرض للملوثات؛ الأشعة فوق البنفسجية؛ التدخين؛ الضغط العصبي الشديدفأيوة الضغوط العصبية المستمرة سبب للشيب ولظهور كل علامات التقدم في العمر بشكل مبكر

وفيه سبب مهم هو مشاكل التغذية, نقص فيتامينات ومعادن زي ب12, الحديد, النحاس, حمض الفوليك, والنقص المزمن المستمر في البروتين..

مشاكل التغذية ينتج عندها شيب قابل للاصلاح بتحسن النقص الغذائي = الشعر بيرجع للونه بمجرد تحسن النقص الغذائي

فيه سببين من دول موجودين بقوة في الأشخاص اللي خضعوا لجراحات الوزن خاصة ال sleeve .. وهما نقص البروتين ونقص الزنك.. فعدم وجود نظام غذائي متوازن بعد العمليات المذكورة ممكن يسبب شيب في الشعر

فيه عوامل أخرى زي وجود أمراض مناعية (منها الحساسية التأتبية) أو استخدام معالجات عنيفة للشعر زي سحب اللون للصبغة .. وباتكلم هنا عن شيب الشعر اللي هاينمو بعدها

نقص هرمونات الغدة الدرقية

فيه بعض الأدوية بتسبب شيب للشعر بيرجع للونه الطبيعي بعد وقفها زي أدوية الملاريا.. مع البروتوكول العلاجي لكورونا عدد ضخم جدا من الناس في مصر اخدوا مضادات ملاريا.. دا كمان بيرجع للونه الأصلي بعد وقف الدواء

التدخين من الحاجات اللي ثبت فعلا ارتباطها بالشيب المبكر.. الامتناع عن التدخين ضروري جدا للصحة العامة ومنها الشعر الصحي

الشعر الشايب أصعب في التعامل من الملون الداكن.. ولكنه ينمو اسرع (شعر الذقن الأبيض ينمو ٥ مرات اسرع من الملون) واكثر تأثرا بأشعة الشمس والتغيرات الجوية.. بالتالي تحتاج عناية خاصة عند الصبغ وكذلك وقاية من الشمس..

الشمس بتبوظ الشعرة البيضاء أكثر من الملونة

أعمل ايه مع الشيب المبكر؟ التأكد من عدم وجود نقص في هرمون الغدة الدرقية وأنيميا وعلاجهم او موجودينقياس مستوى المعادن والڤيتامينات دي في الدم, نقص أي منها محتاج علاج لوقف استمرار الشيب

فيتامين ب12, حمض الفوليك, الحديد, النحاس, الزنك, الفرتين لو المواد دي مش ناقصة من الجسم مش محتاج تاخدها في مكملات غذائية. هي بتسبب الشيب فقط لو نقصت..

الشعر اللي تحول للأبيض بسبب نقص غذائي بيرجع بإصلاح النقص دا

الفيتامين اللي فيه بعض الدراسات بتقول انه بيحسن الشيب حتى لو مش ناقص من الجسم هو بنتوثينات الكالسيوم أو فيتامين ب5 ودا موجود كمكمل غذائي في الصيدليات وموجود بكميات كبيرة في القمح كامل الحبة, الأفوكادو, عيش الغراب, البيض, اللحوم الحمراء وفي الزبادي

مضادات الأكسدة بتساعد جدا كونها بتقاوم الاجهاد التأكسدي.. السيلينيوم وفيتامين سي و فيتامين E هم الأشهر

أتعامل ازاي مع شعر أبيض؟

الأول لازم اعرف ان الشعرة البيضاء اضعف واكثر خشونة وجفافا وأصعب في التعامل من الشعرة بلونها الطبيعي

١- حاول تركه يجف في الهواء دون سيشوار

٢- قللي استخدام المكواة لفرده

٣- بلاش استخدام مواد الفرد ولو استخدمت لا يجب أبدًا أن تمس فروة الرأس

الحياة الصحية من غذاء متوازن ورياضة (ولو خفيفة) ونوم كافي (٧-٨ ساعات) والامتناع عن التدخين كلها فعالة ضد الشعر الأبيض (ولصحة الجسم بالكامل كذلك).. مقاومة أسباب الضغط العصبي مهمة وبتفرق

أهم سؤال: أصبغه ولا لأ؟؟ إجابتي هي: أيوة؛ انصح بصبغه ولكن بمادة طبيعية زي الحنة او بصبغة خالية من الأمونيا.. الأمونيا سبب للاجهاد التأكسيدي فيه وهاتزود الشيب؛ بينما الصبغات الخالية منها حتى لو كان لونها مؤقت لن تتسبب في زيادة الشيبهل النصيحة بالصبغة فقط للسبب التجميلي (وهو مهم)؟؟ لا هي كمان لأن الصبغة بتوفر حماية من أشعة الشمس وبتزود قوة الشعرة لأن كما قلنا؛ الشعرة البيضاء أضعف وأكثر تأثرا بالعوامل الخارجية